ກົມ ຂອ ໄດ້ຈັດກອງປະຊຸມປຶກສາຫາລືທາງໄກ ກ່ຽວກັບ “ຮ່າງ" ປຶ້ມຄຸ່ມືກົນໄກດຸ່ນດ່ຽງເຂົ້າກິນ ແລະ ເຜີຍແຜ່ຄໍາສັ່ງລົບລ້າງການອອກໃບອະນຸຍາດນໍາເຂົ້າລົດແທຣັກເຕີ ໃນຂອບເຂດທົ່ວປະເທດ
ໃນວັນທີ 24 ທັນວາ 2020 ທີ່ຜ່ານມານີ້, ກົມການນຳເຂົ້າ ແລະ ສົ່ງອອກ (ກົມ ຂອ), ກະຊວງອຸດສາຫະກໍາ ແລະ ການຄ້າ (ກະຊວງ ອຄ) ໄດ້ຈັດກອງປະຊຸມປຶກສາຫາລືທາງໄກ (ຜ່ານລະບົບອອນລາຍ) ໂດຍແບ່ງອອກເປັນ 2 ຫົວຂໍ້ທີ່ກ່ຽວກັບ “ຮ່າງປຶ້ມຄຸ່ມືກົນໄກດຸ່ນດ່ຽງເຂົ້າກິນ ແລະ ເຜີຍແຜ່ຄຳສັ່ງລົບລ້າງການອອກໃບອະນຸຍາດນຳເຂົ້າລົດແທຣັກເຕີ” ພາຍໃຕ້ການເປັນປະທານຂອງທ່ານ ສຸລິຍົນ ພິລາວົງ, ຫົວໜ້າກົມ ຂອ ໃນພາກເຊົ້າ ແລະ ທ່ານນາງ ມະນີວອນ ວົງໄຊ, ຮອງຫົວໜ້າກົມ ຂອ ໃນພາກບ່າຍ ແລະ ມີຜູ້ເຂົ້າຮ່ວມຈາກ ຂະແໜງການທີ່ກ່ຽວຂ້ອງ ແລະ ພະແນກ ອຸດສະຫະກຳ ແລະ ການຄ້ານະຄອນຫຼວງ, ແຂວງທົ່ວປະເທດ...
ໃນພາກເຊົ້າ, ກອງປະຊຸມໄດ້ ປຶກສາຫາລືກ່ຽວກັບ ການຮ່າງປຶ້ມຄູ່ມືກົນໄກດຸ່ນດ່ຽງເຂົ້າກິນ. ຈຸດປະສົງແມ່ນເພື່ອ: ແລກປ່ຽນຄຳຄິດເຫັນຈາກຂະແໜງການທີ່ກ່ຽວຂ້ອງ ຕໍ່ກັບ ກົນໄກການດຸ່ນດ່ຽງເຂົ້າກິນ ທີ່ ກົມ ອຂ ໄດ້ສ້າງຂຶ້ນໂດຍອີງຕາມຫຼັກການຂອງ ອົງການອາຫານ ແລະ ກະສິກໍາ (Food and Agriculture Organization, FAO) ເພື່ອເປັນຂໍ້ມູນໃນການປັບປຸງກົນໄກໃຫ້ສົມບູນ ແລະ ແລກປ່ຽນ ໃນຈຸດທີ່ເຫັນວ່າອາດຫຍຸ້ງຍາກສຳລັບການຈັດຕັ້ງປະຕິບັດຕົວຈິງ ໂດຍສະເພາະແມ່ນ ກະຊວງ ກະສິກໍາ ແລະ ປ່າໄມ້, ສະຖາບັນຄົ້ນຄວ້າກະສິກຳ ແລະ ປ່າໄມ້, ກົມການຄ້າພາຍໃນ, ກົມສົ່ງເສີມການຄ້າ ແລະ ກົມແຜນການ ແລະ ການຮ່ວມມື ພ້ອມດ້ວຍແຂກທີ່ຖືກເຊີນທີ່ມາຈາກສູນກາງ, ແຂວງ ແລະ ທ້ອງຖີ່ນ.
ນອກຈາກນັ້ນ, ການສ້າງປື້ມຄູ່ມືນີ້ ຍັງເປັນການສ້າງຖານຂໍ້ມູນສະຖິຕິທີ່ໜ້າເຊື່ອຖື ແລະ ໃຫ້ທັນກັບສະພາບການ ເຊິ່ງເປັນໜຶ່ງໃນບັນດາປັດໄຈຕົ້ນຕໍ ເພື່ອສ້າງນະໂຍບາຍ ແລະ ແຜນພັດທະນາທີ່ໜັກແໜ້ນ, ແນ່ໃສ່ປັບປຸງປະສິດທິພາບໃນການຜະລິດ, ການຄ້າ ແລະ ການຈາລະຈອນເຂົ້າກີນ, ແນ່ໃສ່ຍົກລະດັບຊີວິດການເປັນຢູ່ ແລະ ຫຼຸດຜ່ອນຄວາມທຸກຍາກ ຢູ່ ສປປ ລາວ. ພາຍຫຼັງສຳເລັດການປັບປຸງຕາມຄຳເຫັນຮ່າງຄູ່ມືດັ່ງກ່າວ ກົມ ຂອ ຈະໄດ້ຈັດການຝຶກອົບຮົມ ແລະ ທົດລອງນຳໃຊ້ ກົນໄກການດຸ່ນດ່ຽງເຂົ້າກິນ ຢູ່ 5 ແຂວງເປົ້າໝາຍຂອງໂຄງການ ກໍ່ຄື: ແຂວງໄຊຍະບູລີ, ແຂວງວຽງຈັນ, ນະຄອນຫຼວງວຽງຈັນ, ແຂວງບໍລິຄຳໄຊ ແລະ ແຂວງຄຳມ່ວນ ໃນປີ 2021.
ໃນພາກບ່າຍ, ກອງປະຊຸມໄດ້ ຮັບຟັງການເຜີຍແຜ່ ຄຳສັ່ງລົບລ້າງການອອກໃບອະນຸຍາດນຳເຂົ້າລົດແທຣັກເຕີ ເລກທີ 0807/ອຄ.ກຂອ, ລົງວັນທີ 02 ກັນຍາ 2020 ເຊິ່ງ ຄໍາສັ່ງດັ່ງກ່າວວາງອອກ ເພື່ອຫຼຸດຜ່ອນຂັ້ນຕອນ ແລະ ຕົ້ນທຶນໃນການຜະລິດກະສິກໍາ, ແນໃສ່ຊຸກຍູ້ສົ່ງເສີມການຜະລິດກະສິກຳໃຫ້ກາຍເປັນສິນຄ້າ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແຫ່ງຊາດ. ຈຸດປະສົງແມ່ນເພື່ອການຈັດຕັ້ງປະຕິບັດທີ່ເປັນເອກະພາບກັນໃນຂອບເຂດທົ່ວປະເທດ. ພ້ອມດຽວກັນ, ກົມ ຂອ ຍັງໄດ້ນຳສະເໜີ ສະພາບ ແລະ ຂັ້ນຕອນໃນການອອກໃບອະນຸຍາດດຳເນີນທຸລະກິດ ທີ່ ກົມ ຂອ ພວມຈັດຕັ້ງປະຕິບັດ ເພື່ອເປັນຂໍ້ມູນໃຫ້ ແກ່ ບັນດາ ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງ ໃນການກະກຽມຄວາມພ້ອມ ເພື່ອຈັດຕັ້ງປະຕິບັດສຳລັບ ການອອກໃບອະນຸຍາດດຳເນີນທຸລະກິດນຳເຂົ້າ ແລະ ຈຳໜ່າຍພາຫະນະຮັບໃຊ້ການຜະລິດກະສິກຳ ແລະ ຍານພາຫະນະ 2 ລໍ້ (ລົດຈັກ). ແຜນການຕໍ່ໜ້າ, ກົມ ຂອ ຈະໄດ້ປັບປຸງ ຄູ່ມື, ເງື່ອນໄຂ ແລະ ຂັ້ນຕອນລະອຽດໃນການອອກໃບອະນຸຍາດດຳເນີນທຸລະກິດຂອງກິດຈະການທີ່ກ່າວມານັ້ນ. ຫຼັງຈາກນັ້ນ, ຈະໄດ້ລົງເຜີຍແຜ່ ແລະ ຈັດຝຶກອົບຮົມໃຫ້ບັນດາ ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງ ໃນປີ 2021.