Powered by SITC Lao

ໜ້າຫຼັກ

ກົມການນຳເຂົ້າ ແລະ ສົ່ງອອກ ຈັດຝຶກອົບຮົມການຂໍໃບອະນຸຍາດນຳເຂົ້ານ້ຳມັນເຊື້ອໄຟ ຜ່ານລະບົບແຈ້ງພາສີປະຕູດຽວ Lao National Single Window (LNSW) ໃຫ້ແກ່ ບໍລິສັດນຳເຂົ້າ-ສົ່ງອອກ ນ້ຳມັນເຊື້ອໄຟ ຈຳນວນ 11 ບໍລິສັດ

Category: ຂ່າວ
Published: Thursday, 10 September 2020
Written by Content Manager

ໃນຕອນເຊົ້າຂອງ ວັນພະຫັດທີ 10 ກັນຍາ 2020, ພະແນກ ບໍລິຫານການນຳເຂົ້າ ແລະ ສົ່ງອອກ, ກົມການນຳເຂົ້າ ແລະ ສົ່ງອອກ ໂດຍສົມທົບກັບ ກົມພາສີ ແລະ ບໍລິສັດ ຜູ້ພັດທະນາລະບົບແຈ້ງພາສີປະຕູດຽວແຫ່ງຊາດ (LNSW) ໄດ້ ຈັດກອງປະຊຸມເຜີຍແຜ່ ແລະ ຝຶກອົບຮົມການນຳໃຊ້ ລະບົບແຈ້ງພາສີປະຕູດຽວ Lao National Single Window (LNSW) ເພື່ອຂໍໃບອະນຸຍາດນຳເຂົ້ານ້ຳມັນເຊື້ອໄຟ ໃຫ້ແກ່ 11 ບໍລິສັດນຳເຂົ້າ ແລະ ສົ່ງອອກ ນ້ຳມັນເຊື້ອໄຟ ທີ່ໄດ້ເງື່ອນໄຂຕາມ ດຳລັດ 331/ລບ. ຈຸດປະສົງຂອງກອງປະຊຸມແມ່ນເພື່ອ:

  1. ເຜີຍແຜ່ໃຫ້ບັນດາບໍລິສັດນຳເຂົ້າ-ສົ່ງອອກ ນ້ຳມັນເຊື້ອໄຟ ຊາບວ່າ ໃນວັນທີ 14 ກັນຍາ 2020 ເປັນຕົ້ນໄປ ການຂໍໃບອະນຸຍາດນຳເຂົ້ານ້ຳມັນເຊື້ອໄຟ ຜ່ານດ່ານຂົວມິດຕະພາບ 1 ແມ່ນຈະໄດ້ອອກອະນຸຍາດຜ່ານລະບົບແຈ້ງພາສີປະຕູດຽວແຫ່ງຊາດ ເທົ່ານັ້ນ.
  2. ຝຶກອົບຮົມການນຳໃຊ້ລະບົບໃຫ້ແກ່ ບັນດາບໍລິສັດ ນຳເຂົ້າ-ສົ່ງອອກ ນ້ຳມັນເຊື້ອໄຟ
  3. ປຶກສາຫາລືເປັນເອກະພາບວິທີການຈັດຕັ້ງປະຕິບັດໃນຕໍ່ໜ້າໂດຍສະເພາະແມ່ນການໃຫ້ຄວາມຊ່ວຍເຫຼືອບໍລິສັດ ໃນໄລຍະຕົ້ນຂອງການນຳໃຊ້ລະບົບ.

ມູນຄ່າການນໍາເຂົ້າ ແລະ ສົ່ງອອກຂອງ ສປປ ລາວ ປະຈໍາເດືອນ 7 ປີ 2020 ບັນລຸໄດ້ປະມານ 792 ລ້ານໂດລາສະຫະລັດ.

Category: ຂ່າວ
Published: Wednesday, 26 August 2020
Written by Content Manager
ມູນຄ່າການນໍາເຂົ້າ ແລະ ສົ່ງອອກ ຂອງ ສປປ ລາວ ປະຈໍາເດືອນ 7 ບັນລຸໄດ້ປະມານ 792 ລ້ານໂດລາສະຫະລັດ. ໃນນັ້ນ, ມູນຄ່າການສົ່ງອອກ ມີປະມານ 372 ລ້ານໂດລາສະຫະລັດ, ມູນຄ່າການນໍາເຂົ້າ ມີປະມານ 419 ລ້ານໂດລາສະຫະລັດ ແລະ ຂາດດຸນການຄ້າປະມານ 47 ລ້ານໂດລາສະຫາລັດ. ສິນຄ້າສົ່ງອອກຫຼັກປະກອບມີ: ແຮ່ທອງ, ທອງແດງ ແລະ ເຄື່ອງທີ່ເຮັດດ້ວຍທອງແດງ, ໝາກກ້ວຍ, ເຍື່ອໄມ້ ແລະ ເສດເຈ້ຍ, ໂຄງຮ່າງ ແລະ ຊິ້ນສ່ວນກ້ອງບັນທຶກພາບ, ເຄື່ອງດື່ມ (ນໍ້າ, ນໍ້າອັດລົມ, ຊູກໍາລັງ...), ຄຳປະສົມ ແລະ ຄຳແທ່ງ, ເຄື່ອງນຸ່ງຫົ່ມ, ເຄື່ອງໃຊ້ໄຟຟ້າ ແລະ ອຸປະກອນເຄື່ອງໃຊ້ໄຟຟ້າ ແລະ ຢາງພາລາ. ໝວດສີນຄ້ານໍາເຂົ້າຫຼັກປະກອບມີ: ພາຫະນະທາງບົກ (ນອກຈາກລົດຈັກ,ລົດໄຖ), ເຄື່ອງໄຟຟ້າ ແລະ ອຸປະກອນໄຟຟ້າ, ນ້ຳມັນກາຊວນ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ເຫຼັກ ແລະ ເຄື່ອງທີ່ເຮັດດ້ວຍເຫຼັກ, ເຫຼັກກ້າ, ເຄື່ອງດື່ມ (ນໍ້າ, ນໍ້າອັດລົມ, ຊູກໍາລັງ...), ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້...), ເຫຼັກເສັ້ນ ແລະ ເຫຼັກຮູບປະພັນຕ່າງໆ, ໄຟຟ້າ ແລະ ເຄື່ອງໃຊ້ທີ່ເຮັດດ້ວຍພລາສະຕິກ.

ໜ້າທີ່ຂອງພະ​ແນ​ກສັງ​ລວມ

Category: ພະແນກສັງລວມ
Published: Wednesday, 10 June 2020
Written by Content Manager

1. ຄົ້ນ​ຄ້ວານ​ະ​ໂຍບາຍ​ຂອງ​ລັດຖະບານທີ່​ພົວພັນ​ກັບ​ວຽກງານ​ການ​ນຳ​​ເຂົ້າ ​ແລະ ສົ່ງ​ອອກ​ເພື່ອ​ຫັນ​ເປັນ​ນິຕິ​ກຳ, ລະບຽບການ​ຄຸ້ມ​ຄອງ ​ແລະ ອຳນວຍ​ຄວາມ​ສະດວກ​ໃຫ້​ແກ່​ການ​ນຳ​ເຂົ້າ ​ແລະ ສົ່ງ​ອອກ​ສິນຄ້າ​ ໃນ​ແຕ່ລະ​ໄລຍະ;

2. ຄົ້ນ​ຄ້ວາ ​ແລະ ສ້າງ​ແຜນການ​ເຄື່ອນ​ໄຫວ​ວຽກງານ​ການ​ນຳ​ເຂົ້າ ​ແລ​ະ ສົ່ງ​ອອກ​ສິນຄ້າ​ເປັນ​ແຕ່ລະ​ໄລຍະ​ເຊັ່ນ: ​ໄລຍະ​ຍາ​ວ, ​ໄລຍະ​ກາງ ​ແລະ ​ໄລຍະ​ສັ້ນ​ ​ລວມທັງ​ການ​ເຂົ້າ​ຮ່ວມ​ເພື່ອ​ຄົ້ນ​ຄ້ວາ​ຂຶ້ນ​ແຜນການ​ຮ່ວມ​ມື​ດ້ານ​ການ​ຄ້າ​ກັບ​ຕ່າງປະ​ເທດ​ຕາມ​ເງື່ອນ​ໄຂ​ຕົວ​ຈິງ ​ແລະ ການ​ມອບໝາຍຂອງ​ກົມ;

3. ຊຸກຍູ້​ຕິດຕາມ ​ແລະ ກວດກາ ການ​ຈັດ​ຕັ້ງ​ປະຕິບັດ​ແຜນການ​ແຕ່ລະ​ໄລຍະ ພ້ອມ​ທັງ​ສະ​ຫຼຸບ​ຕີ​ລາຄາຜົນ​ຂອງ​ການ​ເຄື່ອນ​ໄຫວ​ວຽກງານ ​ເພື່ອ​ລາຍ​ງານ​ໃຫ້​ຄະນະ​ກົມ​ກໍ່​ຄື​ກະຊວງ;

4. ຄົ້ນ​ຄ້ວາ​ປະກອບ​ຄຳ​ຄິດ​ເຫັນ​ຕໍ່​ລະບຽບການ​ພາຍ​ໃນ​ກົມ ​ແລ​ະ ພາກສ່ວນ​ຕ່າງໆ ທີ່​ພົວພັນ​ເຖິງ​ວຽກງານ​ການ​ນຳ​ເຂົ້າ ​ແລະ ສົ່ງ​ອອກ​ໃນ​ແຕ່ລະ​ໄລຍະ;

5. ປະສານ​ສົມທົບ​ກັບ​ພະ​ແນ​ກ ອຸດສາຫະກຳ​ ​ແລະ ການ​ຄ້າແຂວງ, ນະຄອນຫຼວງ ​ແລະ ພາກ ສ່ວນ​ກ່ຽວຂ້ອງ​ຕ່າງໆ​ເພື່ອ​ເກັບ​ກຳ, ​ສັງ​ລວມຂໍ້​ມູນ​ສະຖິຕິ​ການ​ນຳ​ເຂົ້າ ​ແລະ ສົ່ງ​ອອກ​ສິນຄ້າ​ແຕ່ລະ​ໄລຍະ​ພ້ອ​ມທັງ​ຄຸ້ມ​ຄອງ ​ແລະ ຕອບ​ສະໜອງຂໍ້​ມູນ​ໃຫ້​ພາກສ່ວນ​ຕ່າງໆ ຕາມ​ຄວາມ​ເໝາະສົມ;

6. ຄົ້ນ​ຄ້ວາ, ສັງ​ລວມການ​ຂຶ້ນ​ແຜນ​ໂຄງການ​ງົບປະມານ ​ແລະ ການ​ລົງທຶນ​ຂອງ​ລັດ​ກ່ຽວກັບ​ວຽກງານ​ຂອງ​ກົມ ພ້ອມ​ທັງ​ຕິດຕາມ​ຄຸ້ມ​ຄອງ​ການຈັດ​ຕັ້ງ​ປະຕິບັດ​ເພື່ອ​ຮັບປະກັນ​ໃຫ້​ມີ​ປະສິດທິ​ຜົນ;

7. ຄຸ້ມ​ຄອງ​ວຽກງານ​ບໍລິຫານ, ການ​ນຳ​ໃຊ້​ງົບປະມານ, ການ​ປົກ​ປັກ​ຮັກສາ​ພາຫະນະ, ວັດຖຸ​ສິ່ງ​ຂອງ​ຕະຫຼອດ​ເຖິງ​ອຸປະກອນ​ຮັບ​ໃຊ້​ຕ່າງໆ​ພາຍ​ໃນ​ກົມ;

8. ປະຕິບັດ​ສິດ ​ແລະ ໜ້າທີ່​ອື່ນໆ ຕາມ​ການ​ມອບໝາຍຂອງ​ຫົວໜ້າ ​ແລະ ຄະນະ​ກົມ.