ສປປ ລາວ ຈັດຢູ່ໃນອັນດັບທີ 154 ຂອງປະເທດທີ່ດໍາເນີນທຸລະກິດງ່າຍ

ໃນບົດລາຍງານ ຂອງທະນາຄານໂລກ Doing Business 2019 ເຊິ່ງຜົນການສຶກສາຄວາມງ່າຍດາຍໃນການເນີນທຸລະກິດຈໍານວນ 190 ປະເທດ ຊີ້ໃຫ້ເຫັນວ່າ ສປປ ລາວ ຍັງຄົງຢູ່ໃນອັນດັບຕໍ່າທີ່ສຸດໃນພາກພື້ນອາຊີຕາເວັນອອກ ແລະ ເຂດປາຊີຟິກ, ຄືພຽງແຕ່ຖືກຈັດໃນອັນດັບດີກວ່າ ສ ມຽນມາ (171) ແລະ ຕີມໍເລສເຕ້ (178). ແຕ່ເມືອທຽບໃສ່ປະເທດເພື່ອນບ້ານອາຊຽນ ແລະ ປະເທດຄູ່ແຂ່ງໃນພາກພື້ນແລ້ວ ສປປ ລາວ ກໍຍັງຢູ່ໃນອັນດັບທີ່ລາກທ້າຍຢູ່ ເຊັ່ນ: ກໍາປູເຈຍ (138), ສສ ຫວຽດນາມ (69), ຣຊ ໄທ (27), ມາເລເຊຍ (15) ເຊິ່ງ ສປປ ລາວ ຖືກຈັດຢູ່ໃນອັນດັບທີ 154. ໃນ 10 ໝວດຕົວຊີ້ວັດ ມີພຽງໝວດຕົວຊີ້ວັດການຄ້າຂ້າມແດນ ທີ່ມີການປ່ຽນແປງໃນລຳດັບດີຂຶ້ນ ຄືຈາກລໍາດັບທີ 124 (2018) ມາເປັນ 76 (2019). ດັ່ງນັ້ນ ພາລະກິດຂອງບັນດາຂະແໜງການກ່ຽວຂ້ອງ ຍັງມີຫຼາຍບັນຫາທີ່ຈະຕ້ອງໄດ້ບຸກທະລຸ ເພື່ອສືບຕໍ່ປັບປຸງແວດລ້ອມການດຳເນີນທຸລະກິດໃນ ສປປ ລາວ ໃຫ້ນັບມື້ນັບດີຂື້ນ ໃຫ້ເປັນທີ່ດຶງດູດນັກລົງທຶນທີ່ມີຄຸນນະພາບທັງພາຍໃນ ແລະ ຕ່າງປະເທດ ເຂົ້າມາລົງທຶນໃນ ສປປ ລາວ ໃຫ້ນັບນື້ນັບຫຼາຍຂື້ນ.

ໃນໄລຍະຜ່ານມາ, ເຖິງແມ່ນວ່າ ລັດຖະບານ ແຫ່ງ ສປປ ລາວ ໄດ້ອອກມາດຕະການ ແລະ ກົນໄກຫຼາຍຮູບການ ເພື່ອປະຕິຮູບແວດລ້ອມໃນການດໍາເນີນທຸລະກິດໃນ ສປປ ລາວ ໃຫ້ຢູ່ໃນລໍາດັບທີ່ດີຂື້ນ ເປັນຕົ້ນແມ່ນ ຄໍາສັ່ງ ວ່າດ້ວຍການປັບປຸງບັນດາລະບຽບການ ແລະ ກົນໄກການປະສານງານໃນການດໍາເນີນທຸລະກິດຂອງນາຍົກລັດຖະມົນຕີ ແລະ ແຜນດໍາເນີນງານວຽກງານອໍານວຍຄວາມສະດວກທາງດ້ານການຄ້າ ປີ 2017-2022 ແລະ ອື່ນໆ. ແຕ່ບົດລາຍງານຂອງທະຄານໂລກຍັງຊີ້ໃຫ້ເຫັນວ່າ ພວກເຮົາຍັງປະຕິບັດບໍ່ໄດ້ດີເທົ່າທີ່ຄວນ ເຊິ່ງມີຫຼາຍໝວດຕົວຊີ້ວັດທີ່ລໍາດັບການປ່ຽນແປງຈາກສອງຕົວເລກຂື້ນເປັນສາມຕົວເລກ ເຊິ່ງການສະເລ່ຍຕົວເລກໂດຍລວມແລ້ວ ເຮັດໃຫ້ ສ ປປ ລາວ ຈັດໃນອັບດັບທີ 154 ໃນຈໍານວນ 190 ປະເທດ ເຫັນໄດ້ວ່າ ຄວາມພະຍາຍາມໃນໄລຍະຜ່ານມາຂອງແຕ່ຂະແໜງການກ່ຽວຂ້ອງ ແມ່ນຍັງບໍ່ໄດ້ຮັບໝາກຜົນຕາມທີ່ໄດ້ຄາດຫວັງໄວ້ ເປົ້າໝາຍແມ່ນຫຼຸດອັນດັບລົງເຫຼືອພຽງສອງຕົວເລກ.

ດັ່ງນັ້ນ, ຈາກບົດລາຍງານຂອງທະນາຄານໂລກ ພວກເຮົາເຫັນໄດ້ຄວາມສໍາຄັນຂອງ ການສືບຕໍ່ເອົາໃຈໃສ່ຂື້ນຕື່ມໃນການປັບ ປຸງກົນໄກການບໍລິຫານງານຂອງບັນດາຂະແໜງການກ່ຽວຂ້ອງ ແມ່ນມີບົດບາດສໍາຄັນຕັດສິນວ່າ ລໍາດັບໃນການດໍາເນີນທຸລະກິດຂອງ ສປປ ລາວ  ໃຫ້ບັນລຸເປົ້າໝາຍຈາກສາມຕົວເລກເປັນສອງຕົວເລກ. ເພາະວ່າ ລໍາດັບທີ່ດີຂື້ນໝາຍເຖິງແຕ່ລະໝວດຕົວຊີ້ວັດມີຄະແນນ້ອຍລົງ ການຫຼຸດລົງຂອງຄະແນນບົງບອກເຖິງສະພາບແວດລ້ອມຂອງ ສປປ ລາວ ເຊິ່ງໃນມູມມອງຂອງນັກລົງທຶນ ແມ່ນດີຂື້ນ ຫຼື ເຮັດໃຫ້ໜ້າສົນໃຈຫຼາຍຂື້ນໃນການເຂົ້າມາລົງທຶນໃນ ສປປ ລາວ. ໃນເມື່ອມີການລົງທຶນທີ່ເພີ່ມຂື້ນ ຈະຊ່ວຍສ້າງວຽກເຮັດງານທໍາໃຫ້ປະຊາຊົນມີລາຍຮັບທີ່ໝັ້ນຄົງ ກາ້ວໄປສູ່ການຫຼຸດພົ້ນຈາກສະຖານະເປັນປະເທດດ້ອຍພັດທະນາໃນປີ 2020 ໃຫ້ສໍາເລັດ.

ເຖິງຢ່າງໃດກໍຕາມ, ສປປ ລາວ ກໍຍັງມີບາງໝວດຕົວຊີ້ວັດ ແມ່ນມີລໍາດັບດີຂື້ນຕາມລໍາລັບ ເປັນຕົ້ນແມ່ນໝວດຕົວຊີ້ວັດການຄ້າຂ້າມແດນ ແມ່ນໄດ້ມີການປັບປຸງລໍາດັບດີຂຶ້ນ ​ແບບ​ກ້າວ​ກະ​ໂດດ ໂດຍມີການປັບປຸງຂັ້ນຕອນການແຈ້ງພາສີ. ການສຶກສາໝວດຕົວຊີ້ວັດການຄ້າຂາມແດນແມ່ນວັດແທກ ເວລາ ແລະ ຄ່າໃຊ້ຈ່າຍໃນການປະກອບເອກະສານນຳເຂົ້າ ແລະ ສົ່ງອອກ, ຂັ້ນຕອນຢູ່ດ່ານຂ້າມແດນ ແລະ ການຂົນສົ່ງພາຍໃນ. ໃນນັ້ນ, ເຫັນວ່າ ເວລາທີ່ໃຊ້ໃນການດຳເນີນເອກະສານ ສຳລັບການນຳເຂົ້າ ແລະ ສົ່ງອອກ ຫຼຸດລົງ 3 ຊົ່ວໂມງ ແລະ ເວລາດຳເນີນຂັ້ນຕອນຢູ່ດ່ານສຳລັບການນຳເຂົ້າ ແລະ ສົ່ງອອກ ຫຼຸດລົງ 156 ຊົ່ວໂມງ (ຫຼຸດລົງ 72%).

10 ໝວດຕົວຊີ້ວັດປະກອບດ້ວຍ: ການແກ້ໄຂລົ້ມລະລາຍ; ການປົກປ້ອງຜູ້ລົງທຶນລາຍນ້ອຍ; ການເລີ່ມຕົ້ນທຸລະກິດ; ການເອົາໄຟຟ້າເຂົ້າ; ການມອບອາກອນ; ການຄ້າຂ້າມແດນ;​ ການປະຕິບັດສັນຍາ;​ ການເຂົ້າເຖິງສິນເຊື່ອ; ການຈົນທະບຽນຊັບສິນ; ແລະ ການຂໍອະນຸຍາດປຸກສ້າງ ລາຍລະອຽດຄະແນນຂອງ ແຕ່ລະໝວດຊີ້ວັດຂອງ ສປປ ລາວ ດັ່ງລຸ່ມນີ້:

1.    ສປປ ລາວ ໄດ້ປັບປຸງອັນດັບຂອງຕົນໃນການເລີ່ມທຸລະກິດຈາກອັນດັບທີ 164 ເປັນ 180.
2.    ສປປ ລາວ ຖືກຈັດອັນດັບໃນການຂໍໃບອະນຸຍາດປຸກສ້າງ 99/190.
3.    ສໍາລັບການຕິດຕັ້ງໄຟຟ້າໃນ ສປປ ລາວ ແມ່ນຢູ່ອັນດັບ 156/190.
4.    ໃນຂົງເຂດການຈົດທະບຽນຊັບສິນ ສປປ ລາວຈັດຢູ່ໃນອັນດັບທີ 85/190.
5.    ການເຂົ້າເຖິງແຫຼ່ງທຶນ ເຊິ່ງໃນປະຈຸບັນຢູ່ໃນອັນດັບທີ 73/190.
6.    ສປປ ລາວ ຍັງຄົງຈັດຢູ່ໃນອັນດັບທີ 174/190 ໃນການປົກປ້ອງນັກລົງທຶນ.
7.    ການຈ່າຍພາສີ-ອາກອນຍັງຢູ່ອັນດັບ 155/190.
8.    ໃນການປະເມີນດ້ານການຄ້າຂ້າມແດນ, ສປປ ລາວແມ່ນມີການປັບໂຕຢູ່ອັນດັບ 76/190.
9.    ການຈັດຕັ້ງປະຕິບັດສັນຍາມີຜົນສັກສິດໃນ ສປປ ລາວ ຢູ່ໃນອັນດັບ162/190.
10. ການແກ້ໄຂການລົ້ມລະລາຍຂອງ ສປປ ລາວ ຍັງຄົງຢູ່ໃນອັນດັບທີ 168/190.

ແຫຼ່ງຂໍ້ມູນ: ບົດລາຍງານ Doing Business 2019: Training for Reform, ກຸ່ມທະນາຄານໂລກ