ສະຫຼຸບການຈັດຕັ້ງປະຕິບັດແຜນພັດທະນາ ແລະ ແຜນວຽກຈຸດສຸມ ຂອງກົມ ຂອ ປະຈໍາ 09 ເດືອນ ຕົ້ນປີ 2018

Category: ຂ່າວ Published: Tuesday, 16 October 2018 Written by Content Manager

ໃນໄລຍະ 09 ເດືອນ ຕົ້ນປີ 2018, ມີຫຼາຍວຽກທີ່ສໍາຄັນ ແລະ ພົ້ນເດັນ ໄດ້ສໍາເລັດ ເຊັ່ນ: ສະຖິຕິການນຳເຂົ້າ ແລະ ສົ່ງອອກ; ຄົ້ນຄວ້າບັນຫາທີ່ຕິດ ພັນກັບການນໍາເຂົ້າ ແລະ ສົ່ງອອກ ໂດຍສະເພາະການຜັນຂະຫຍາຍ ຄໍາສັ່ງ 02/ນຍ,ລົງວັນທີ 01 ກຸມພາ 2018; ລວມທັງຈັດກອງປະຊຸມຝຶກອົບຮົມ ແລະ ສໍາມະນາ; ແລະອອກອະນຸຍາດ...

ສໍາລັບສະຖິຕິການນໍາເຂົ້າ ແລະ ສົ່ງອອກ, ຄາດວ່າມູນຄ່າການນໍາເຂົ້າ ແລະ ສົ່ງອອກ ຈະບັນລຸໄດ້ US$ 8,039 ລ້ານ[1] ແລະ ເທົ່າກັບ 80% ຂອງແຜນການປີ 2018 ຈາກຕົວເລກດັ່ງກ່າວເຫັນວ່າເພີ່ມຂຶ້ນ 15% ເມື່ອທຽບໃສ່ໄລຍະດຽວກັນຂອງປີຜ່ານມາ ໃນນີ້: ມູນຄ່າການນໍາເຂົ້າຄາດວ່າຈະເທົ່າກັບ US$ 4,123 ລ້ານ, ເພີ່ມຂຶ້ນ 21% ເມື່ອທຽບໃສ່ໄລຍະດຽວກັນຂອງສົກປີຜ່ານມາ; ໝວດສິນຄ້າທີ່ນໍາເຂົ້າຕົ້ນຕໍແມ່ນ ນໍ້າມັນເຊື້ອໄຟ, ພາຫະນະ ແລະ ຊິ້ນສ່ວນອາໄຫຼ່, ເຄື່ອງໃຊ້ໄຟຟ້າ, ອຸປະກອນກົນຈັກ ແລະ ອຸປະກອນກໍ່ສ້າງ; ປະເທດນໍາເຂົ້າທີ່ກວມເອົາມູນຄ່າຫຼາຍແມ່ນ: ໄທ, ຈີນ, ຫວຽດນາມ, ຍີ່ປຸ່ນ, ເກົາຫຼີ, ອິນໂດເນເຊຍ, ສິງກະໂປ, ອົດສະຕາລີ, ຮົງກົງ ແລະ ແບນຊິກ. ມູນຄ່າການສົ່ງອອກຄາດວ່າຈະບັນລຸໄດ້ປະມານ US$ 3,916 ລ້ານ, ເພີ່ມຂຶ້ນ 8% ເມື່ອທຽບໃສ່ໄລຍະດຽວກັນຂອງສົກປີຜ່ານມາ; ໝວດສິນຄ້າທີ່ສົ່ງອອກຕົ້ນຕໍ ເຊັ່ນ: ໄຟຟ້າ, ແຮ່ທອງ ແລະ ທອງແດງ, ເຄື່ອງໄຟຟ້າ ແລະ ອຸປະກອນເຄື່ອງໄຟຟ້າ, ຄໍາປະສົມ, ຢາງພາລາ, ກາເຟ ແລະ ເຄື່ອງນຸ່ງຫົ່ມ; ຕະຫຼາດສົ່ງອອກຕົ້ນຕໍ ແມ່ນ: ໄທ, ຈີນ, ຫວຽດນາມ, ອິນເດຍ, ຍີ່ປຸ່ນ, ເຢຍລະມັນ, ສະວິດເຊີແລນ, ສະວິເດນ, ອັງກິດ ແລະ ສ.ອາເມລິກາ. ສໍາລັບດຸນການຄ້າ ໃນ 09 ເດືອນຕົ້ນປີ 2018 ຄາດວ່າຈະຂາດດຸນ US$ 207 ລ້ານ.

ເພື່ອເປັນຜັນຂະຫຍາຍ ຄໍາສົ່ງ 02/ນຍ, ກົມ ຂອ ໄດ້ສ້າງແຜນວຽກ ແລະ ຈັດຕັ້ງປະຕິບັດຢ່າງລະອຽດພໍສົມຄວນ ເຊິ່ງໜຶ່ງໃນແຜນວຽກດັັ່ງກ່າວ ກໍ່ແມ່ນ: (1) ການສໍາເລັດສ້າງຕັ້ງຄະນະກໍາມະການຊີ້ນໍາອໍານວຍຄວາມສະດວກທາງດ້ານການຄ້າ (ຂໍ້ຕົກລົງຂອງ ທ່ານ ນາຍົກລັດຖະມົນຕີ ສະບັບເລກທີ 48/ນຍ, ລົງວັນທີ 26/7/2018 ວ່າດ້ວຍການແຕ່ງຕັ້ງຄະນະກຳມະການຊີ້ນຳອຳນວຍຄວາມສະດວກທາງດ້ານການຄ້າ); (2) ອອກຄໍາແນະນໍາ ວ່າດ້ວຍການເກັບກໍາຂໍ້ມູນການຄ້າຊາຍແດນ ສະບັບເລກທີ 3231/ກຂອ.ຊດ, ລົງວັນທີ 13 ກໍລະກົດ 2018 ໃຫ້ບັນດາພະແນກອຸດສາຫະກຳ ແລະ ການຄ້າ ແຂວງ ໃນທົ່ວປະເທດ; (3) ສະຫຼຸບລາຍງານການຈັດຕັ້ງປະຕິບັດ ຄຳສັ່ງ ເລກທີ 15/ນຍ ໃນສ່ວນທີ່ຕິດພັນກັບວຽກງານຂອງກົມ ໂດຍສະເພາະຄວາມຄືບໜ້າການປະມູນຂາຍໄມ້ຍຶດທົ່ວປະເທດ ແລະ ຂໍ້ສະເໜີຕ່າງໆທີ່ຕິດພັນກັບວຽກງານ ຄະນະປະມູນຂາຍໄມ້ຍຶດຂັ້ນແຂວງ ໃຫ້ ລັດຖະບານ ຊາບ ຈຳນວນ 02 ຄັ້ງ; (4) ອອກແຈ້ງການ ເລກທີ 3749/ກຂອ,ບຂອ, ລົງວັນທີ 15 ສິງຫາ 2018 ເພື່ອລົບລ້າງ ໃບອະນຸຍາດສົ່ງອອກເພັດຫຍາບ (ໃບເຈ້ຍຂາວA4) ແລະ ປັບປຸງຄະນະລົງກວດກາການນໍາເຂົ້າ ແລະ ສົ່ງອອກ ເພັດຫຍາບ ແລະ ອື່ນໆ.

ຄຽງຄູ່ກັບການຄົ້ນຄວ້າ ທີ່ກ່າວມາຂັ້ນເທິງແລ້ວ ການຈັດຝຶກອົບຮົມ ແລະ ສໍາມະນາ ກໍ່ເປັນອິກໜຶ່ງວຽກງານທີ່ກົມໄດ້ເອົາໃຈໃສ່, ເຊິ່ງໃນ 9 ເດືອນຕົ້ນປີ 2018 ນີ້ ໄດ້ຈັດຝຶກອົບຮົມ ກ່ຽວກັບ: (1) ວຽກງານການປັບປຸງ ແລະ ຮັບຮອງບັນຊີລາຍການສິນຄ້າເກືອດຫ້າມນຳເຂົ້າ-ສົ່ງອອກ ແລະ ບັນຊີລາຍການສິນຄ້າທີ່ຕ້ອງຂໍອະນຸຍາດນຳເຂົ້າ ຫຼື ສົ່ງອອກ ແບບອັດຕະໂນມັດ ແລະ ບໍ່ອັດຕະໂນມັດ ຈໍານວນ 2 ຄັ້ງ; (2) ວຽກງານການຄຸ້ມຄອງສິນຄ້າຍຸດທະສາດ ທີ່ສາມາດນຳໃຊ້ໄດ້ສອງດ້ານ (Dual-use Items) ພາຍໃຕ້ໂຄງການ EU P2P Programme on Export Control ຮ່ວມກັບ ກົມ ຂອ 4 ຄັ້ງ; (3) ວຽກງານອອກໃບຢັ້ງຢືນແຫຼ່ງກໍາເນີດສິນຄ້າ 2 ຄັ້ງ; (4) ບົດປະເມີນຜົນກະທົບທາງດ້ານລະບຽບການຂອງຮ່າງຂໍ້ຕົກລົງ ວ່າດ້ວຍສິດທາງດ້ານການຄ້າຂອງຜູ້ຄ້າຕ່າງປະເທດ (Trading Rights) 1 ຄັ້ງ; (5) ໄດ້ເຂົ້າພົບ ແລະ ສົມທົບເຮັດວຽກກັບຂະແໜງການກ່ຽວຂ້ອງພາກລັດ ແລະ ພາກທຸລະກິດ ຈໍານວນ 10 ຄັ້ງ.

ໃນສວ່ນການອອກອະນຸຍາດ (ນັບແຕ່ 01/01/-29/08/2018) ເຫັນວ່າ: (1) ການນໍາເຂົ້ານໍ້າມັນເຊື້ອໄຟ ທັງໝົດ ຈໍານວນ 697,621,306 ລິດ, ມູນຄ່າ 417,723,483 ໂດລາສະຫະລັດ; (2) ນຳເຂົ້າເພັດຫຍາບ ຈຳນວນ 18,266.9 ກະຣັດ, ມູນຄ່າ 2,463,029.03 ໂດລາສະຫະລັດ ຈາກປະເທດ Belgium ແລະ ສົ່ງອອກເພັດຫຍາບ ຈໍານວນ 1,293.38 ກະຣັດ, ມູນຄ່າ 44,173,182.72 ໂດລາສະຫະລັດ ແລະ ສົ່ງອອກເພັດທີ່ເຈຍລະໄນແລ້ວ ຈຳນວນ 3,264.87 ກະຣັດ, ມູນຄ່າ 1,588,869.41 ໂດລາສະຫະລັດ ໄປປະເທດ Switzerland; (3) ອອກໃບຢັ້ງຢືນແຫຼ່ງກໍາເນີດສິນຄ້າ ຈຳນວນ 474 ຊຸດ, ມູນຄ່າ 28,273,109.89 USD^{^[2]}. ໃນນີ້, ອອກໃບຢັ້ງຢືນແຫຼ່ງກໍາເນີດສິນຄ້າ ຜ່ານລະບົບ E-CO ຈຳນວນ 417 ຊຸດ, ມູນຄ່າ 23,405,170.73 USD; (4) ຢັ້ງຢືນການນໍາສິນຄ້າ ປະເພດ ແຮ່ເຫຼັກ, ແຮ່ທອງ ແລະ ເກືອກາລີ ຈາກ ສປປ ລາວ ຜ່ານແດນ ສສ ຫວຽດນາມ ເພື່ອສົ່ງອອກຕໍ່ໄປປະເທດທີສາມ ແຕ່ຕົ້ນປີ 2018 ເຖິງປະຈຸບັນ ມີທັງໝົດ 29 ຊຸດ ມູນຄ່າ 506,083,000 ໂດລາສະຫະລັດ, ປະເພດ ລົດ ຈໍານວນ 06 ຊຸດ ມູນຄ່າ 10,119,587 ໂດລາສະຫະລັດ ແລະ ຢັ້ງຢືນການນໍາສິນຄ້າ ປະເພດ ອຸປະກອນການແພດ, ຕູ້ຫຼີ້ນເກມ ແລະ ເຄື່ອງປະກອບ ຈາກປະເທດທີສາມ ຜ່ານແດນ ສສ ຫວຽດນາມ ເຂົ້າມາ ສປປ ລາວ 17 ຊຸດ ມູນຄ່າ 12,513,008.05 ໂດລາສະຫະລັດ ກັບ 716,669 ເຢນ; (5) ອອກໃບຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ພາຍໃຕ້ໂຄງການທົດລອງຂອງສະຫະພາບເອີຣົບ ມາຮອດປະຈຸບັນມີ ຈຳນວນ 31 ບໍລິສັດ ທີ່ສາມາດຢັ້ງຢືນແຫຼ່ງກຳເນີດສິນຄ້າດ້ວຍຕົນ; (6) ອອກຢັ້ງຢືນແຫຼ່ງກຳເນີດສິນຄ້າດ້ວຍຕົນເອງພາຍໃຕ້ ໂຄງການທົດລອງຂອງສະຫະພາບເອີຣົບ ຫຼື REX ໃຫ້ແກ່ 60 ບໍລິສັດ; (7) ອອກຢັ້ງຢືນສົ່ງອອກສິນຄ້າ ປະເພດ ໃບຢາສູບ ຈາກ ສປປ ລາວ ໄປ ປະເທດ ໄທ ຊົ່ວຄາວ ແລະ ນໍາເຂົ້າມາ ສປປ ລາວ ຄືນ ຈຳນວນ 2,250,000 ກິໂລ ມູນຄ່າ 5,760,000 ໂດລາສະຫະລັດ ໃຫ້ແກ່ ບໍລິສັດ ຢາສູບລາວ ຈໍາກັດ.

ເຖິງວ່າຈະມີຫຼາຍໜ້າວຽກໄດ້ເຮັດສໍາເລັດແລ້ວ ແຕ່ກໍ່ຍັງມີວຽກງານຈໍານວນໜຶ່ງຍັງຈະໄດ້ສືບຕໍ່ຈັດຕັ້ງປະຕິບັດ ເຊັ່ນ: ວຽກງານສະຫຼຸບ-ສັງລວມ; ວຽກງານບໍລິ ຫານ ແລະ ບໍລິການ ແລະ ວຽກງານໂຄງການຕ່າງໆ. ສະນັ້ນ, ເພື່ອເປັນການຫຼ້ອນໜ້າທີ່ການເມືອງ, ຄະນະນໍາຂອງກົມ ຂອ ຈຶ່ງໄດ້ເອົາໃຈໃສ່ຊີ້ນຳໆພາຢ່າງໃກ້ຊິດ ແລະ ມີການກໍ່ສ້າງອ້າຍນ້ອງພະນັກງານເປັນແຕ່ລະໄລຍະ ໃຫ້ມີຄວາມເຂົ້າໃຈ, ມີຄວາມຮັບຜິດຊອບ, ມີຄວາມສາມັກຄີ, ມີການພັດທະນາ ແລະ ເຫັນເຖິງຄວາມສໍາຄັນຂອງ ບັນດາວຽກງານ.

[1] ຕົວເລກ 9 ເດືອນ ຕົ້ນປີ 2018 ແມ່ນຕົວເລກຄາດຄະເນ. ໃນນີ້, ຕົວເລກເດືອນ 1-6 ຂອງງວດ I ແລະ ງວດ II ແມ່ນຕົວເລກປະຕິບັດໄດ້ ແລະ ຕົວເລກເດືອນ 7-9 ຂອງງວດ III ແມ່ນຕົວເລກຄາດຄະເນ.

[2] ບໍ່ໄດ້ລວມມູນຄ່າເຄື່ອງຕັດຫຍິບ ທີ່ສົ່ງໄປຕະຫຼາດ EU