ຂ່າວ

ສະພາບການນຳເຂົ້າ ແລະ ສົ່ງອອກ ຂອງ ສປປ ລາວ 4 ເດືອນຕົ້ນປີ 2019

      ໂດຍອີງຕາມຂໍ້ມູນທີ່ໄດ້ຮັບຈາກກົມພາສີ, ກະຊວງການເງິນ ແລະ ຂໍ້ມູນໄຟຟ້າຈາກກະຊວງພະລັງງານ ແລະ ບໍ່ແຮ່ (ຂໍ້ມູນໄຟຟ້າ ເດືອນ 3 ແລະ ເດືອນ 4 ຍັງບໍ່ທັນໄດ້ຮັບຄົບທຸກເຂື່ອນ) ໃນ 4 ເດືອນຕົ້ນປີນີ້ ເຫັນວ່າ ມູນຄ່າການນໍາເຂົ້າ ແລະ ສົ່ງອອກ ບັນລຸໄດ້ປະມານ 3,662 ລ້ານໂດລາ, ເພີ່ມຂຶ້ນ 2.2% ເມື່ອທຽບໃສ່ໄລຍະດຽວກັນຂອງປີຜ່ານມາ ແລະ ບັນລຸ 32.4% ຂອງແຜນການປີ 2019. ໃນນີ້ ມູນຄ່າການສົ່ງອອກບັນລຸໄດ້ທັງໝົດປະມານ 1,938 ລ້ານໂດລາ, ເພີ່ມຂຶ້ນ 10.7% ແລະ ບັນລຸ 35.1% ຂອງແຜນການປີ. ສ່ວນການນໍາເຂົ້າບັນລຸໄດ້ປະມານ 1,724 ລ້ານໂດລາ, ຫຼຸດລົງ 6% ແລະ ບັນລຸໄດ້ 30% ຂອງແຜນການປີ. ສາເຫດທີ່ພາໃຫ້ມີການນໍາເຂົ້າໜ້ອຍກວ່າການສົ່ງອອກ ອາດຍ້ອນໃນຊ່ວງຕົ້ນປີນີ້ ຫລາຍບໍລິສັດ ແລະ ໂຄງການ ຍັງບໍ່ທັນໄດ້ຮັບການອະນຸມັດແຜນນໍາເຂົ້າ (Master list) ຈາກກະຊວງແຜນການ ແລະ ການລົງທຶນ ເນື່ອງຈາກວ່າ ແຜນດັ່ງກ່າວ ແມ່ນໃຊ້ເພື່ອຮັບການຍົກເວັ້ນ ຫຼື ຫຼຸດຜ່ອນພາສີ-ອາກອນ ໃນການນໍາເຂົ້າ.

ຢ່າງໃດກໍຕາມ, ຕາມແຜນທີ່ຄາດຄະເນໄວ້ ໃນຕໍ່ໜ້າການສົ່ງອອກຄາດວ່າຈະຍັງມີທ່າອ່ຽງເພີ່ມຂຶ້ນ ເຊິ່ງໜຶ່ງໃນເຫດຜົນຂອງການເພີ່ມຂຶ້ນ ອາດແມ່ນຍ້ອນ ນະໂຍບາຍຂອງລັດຖະບານ ຍັງສືບຕໍ່ສົ່ງເສີມ ແລະ ດຶງດູດການລົງທຶນທັງພາຍໃນ ແລະ ຈາກຕ່າງປະເທດ ເຊັ່ນ: ຜູ້ລົງທຶນໃນເຂດເສດຖະກິດພິເສດ-ເສດຖະກິດສະເພາະ ແມ່ນຈະໄດ້ຮັບນະໂຍບາຍດ້ານພາສີ-ອາກອນ. ນອກນັ້ນ, ຕໍ່ກັບໝວດສິນຄ້າ ໂດຍສະເພາະ ໝວດກະສິກໍາ ເປັນຕົ້ນແມ່ນ ມັນຕົ້ນ, ໝາກກ້ວຍ, ຢາງພາລາ... ຍັງສືບຕໍ່ສົ່ງອອກຢ່າງເປັນປົກກະຕິ. ຄຽງຄູ່ກັບການສົ່ງອອກນັ້ນ, ການນໍາເຂົ້າກໍ່ມີທ່າອ່ຽງທີ່ເພີ່ມຂຶ້ນເຊັ່ນກັນ ອາດຈະເປັນຍ້ອນວ່າ ໃນໄລຍະດັ່ງກ່າວ ບໍລິສັດສ່ວນໃຫຍ່ ແມ່ນໄດ້ຮັບອະນຸມັດແຜນນຳເຂົ້າ (Master list) ຈາກກະຊວງແຜນການ ແລະ ການລົງທຶນ ແລ້ວ; ພ້ອມດຽວກັນ, ບັນດາໂຄງການໃຫຍ່ຕ່າງໆ ເປັນຕົ້ນແມ່ນທາງລົດໄຟ, ທາງດ່ວນ...ຍັງສືບຕໍ່ນໍາເຂົ້າມາເປັນຈໍານວນຫຼາຍ ແລະ ເຂດເສດຖະກິດພິເສດ-ເຂດສະກິດສະເພາະ ກໍ່ສືບຕໍ່ມີການນໍາເຂົ້າ ເພື່ອມາປຸງແຕ່ງແລ້ວສົ່ງອອກ.